Job 11

Impendulo kaZofari

1 Yikho uZofari umNamathi wasephendula wathi:

2 “Uthi amazwi wonke la angayekela ukuphendulwa na? Iphotshophotsho leli liyekelwe nje libheda?

3 Umbhedo wakho lo wenze abantu bathule na? Uthi ungakhuzwa muntu wena ukhulumela eceleni?

4 Uthi kuNkulunkulu, ‘Inkolo yami kayilansolo njalo ngimsulwa phambi kwakho.’

5 Hawu, ngize ngifise ukuthi ngabe uNkulunkulu angakhuluma, ubezavula izindebe zakhe ekusola

6 akuvulele izimfihlo zokuhlakanipha, ngoba inhlakanipho yeqiniso ikabili. Yazi lokhu: UNkulunkulu uvele usezikhohliwe ezinye izono zakho.

7 “Kambe ungayifinyelela yini imfihlakalo kaNkulunkulu? Ungaziphenya iziphetho zikaSomandla na?

8 Ziqongile ngaphezu kwamazulu – ungenzani kambe? Zizikile kulokutshona kweliba – kuyini ongakwazi pho?

9 Ukulinganiswa kwazo kude kulomhlaba njalo kubanzi kulolwandle.

10 “Aluba esiza lapha akuphosele entolongweni abize inkundla, ngubani ongamphikisa na?

11 Liqiniso ukuthi uyababona abantu abakhohlisayo; njalo nxa ebona okubi, kananzeleli na?

12 Kodwa umuntu oyisithutha ngeke ahlakaniphe njengoba ubabhemi weganga engeke azalwa ngumuntu.

13 “Ikanti nxa ugxilisa inhliziyo yakho kuye uphakamisele izandla zakho kuye,

14 aluba ulahla isono esisesandleni sakho ungavumeli bubi buhlale ethenteni lakho,

15 lapho-ke uzabuveza ubuso bakho ungelanhloni; uzakuma uqine ungesabi.

16 Uzalukhohlwa ngempela uhlupho lwakho, lufike nje engqondweni njengezikhukhula ezadlulayo.

17 Impilo izakhanya kulemini enkulu, lobumnyama buzakuba njengasekuseni.

18 Uzavikeleka, ngoba ithemba likhona; uzathalaza langaphi kwakho uzuze ukuphumula uvikelekile.

19 Uzazilalela, kungekho okwethusayo, njalo abanengi bazabe sebezisondeza kuwe.

20 Kodwa amehlo ababi azafiphala, behluleke lokubaleka; ithemba labo libe yikuhotsha umoya wokufa.